Retour au sommaire      

                                                         Mes coups de gueule!

 N°2: Déclaration

Ah, mes gins! V'là arvénu l'momint d'rimplir vou feulle d'impôt et cha, ch'est pont toudis agréape! Ch't'année, nou Minisse des Finances (enfin, ch'l'avant dernier, ch'nouviaui n'a pont eu l'timps d'mette sin nom, qui sait? ) i nou déclare (ju d'mot!) qu'in peut l'faire dsus ch'l'arnitoile aveuc, à l'clé, ein' pitite réduction d'vingt euros. Pinsez si j'a sauté dsus l'occasion! Ah ouaite, que cirque!

J'vou raconte min calvaire: d'abord, jé m'rinds dsus ch'site des Finances, là cha comminchot bien, j'sus queut dsus du premier coup!

Première imbroulle: in m'demante min niméro d'dossier fiscal inscrit dsus l'déclaration papier, cha qué j'fais.........pour qu'in m'réponche: Numéro erroné! J'arcomminche donc in pinsant qu'j'a fait ein' erreur, meim-me réponse! Là, jé m'dis: "Y a ein sécot qui n'va nein"

Adon, j'm'in vas in bas de l'pache, à l'rubrique "Écrivez-nous" et j'clique: résultat.......j'vous don-ne in mille: l'boîte à lettes al est momintanémint inaccessipe!

O z'avez compris, mes gins, j'vénos d'perte vingt euros, ben véyons!

Com-me j'sus d'ein naturel cabochard et pour n'pont rester dsus ein échec, jé m'dis "J'm'in vas carculer combien cha va faire à païer" et j'finis par trouver l'rubrique "Calcul de votre impôt": il fallot rimplir ches casses aveuc min nom, m'n'adrèche et j'm'artreufe à l'casse "Situation familiale". In d'mandot, pour min mariache, l'jour et l'mouos, cha cha été tout seul, mais pour ch'l'année........jé n'pouvos rien mette à causse qu'ch'étot déjà écrit 2004 et pont moïen d'canger!

Avouez, mes gins, qu'i a d'quoi ruer d'dins ches brancards! Final'mint, j'a fait com-me toudis.......j'a rimpli m'feulle à l'main, et cha m'a coûté vingt euros!