Retour au sommaire      

                                                       Mes coups de gueule!

 N°3: Amis pêqueux, o z'êtes servis!

Y a quèque temps, nous z'hommes politiques i z'avottent eu ein' riche idée (ju d'mot, o z'allez vir' pourquoi dins cho qui suit!): faire païer tous cheusses qui salichottent l'iau aveuc leus salop'ries. Jé m'dis adon qu'ch'étot enfin ein' bon-ne nouvelle, surtout qu'in allot vir cho qu'in allot vir: i z'allotent passer à l'moulinette ches sinciers, ches z'industriels.et ches pêqueux. Pour mi, pêqueux d'pis tout l'timps, ch'étot ein tiot peu dur pasque min père, qui m'avot mis in route à l'pêque, i m'dijot toudis:" Quand té quittes t'plache, I faut l'laicher cor pus prope qu'té l'as trouvée". Mais  bon, pisqu'il fallot arouvrir sin port'monnaie, au moins cha sérot pour ein' bon-ne causse, enfin, jé l'avos cru.

Ah ouaite! cor ein coup, j'avos arcru à Pére Noël (et pourtant, ch'est mis qui l'avos prév'nu d'faire attintion ): ches jours derniers, ch'fameux décret i a paru et d'vinez qui ch'est qui va raquer? O creuyez pétête à ches z'industriels qui balent leus arbuts dins ches rivières ou bien à ches sinciers aveuc leus ingrais.........eh ben, o z'avez tout faux! Ch'est ches pêqueux qui vont ête obligés d'païer leu permis pus querre pour nettier ches cours d'iau!

Non mais, ch'est vrai cha: qui ch'est qui jette d'l'amorce dins l'iau? Qui ch'est qui lafe ses mains dins l'rivière? Qui ch'est qui trimpe du fil et des ham'çons dins "l'onde claire"? Ben, voïons, ch'est ches maudits pêqueux qui sont in train d'polluer nous si biaux cours d'iau jusqu'adon si clairs. O z'avez qu'à faire ein tour au bord dé ch'canal et o verrez ches flaques d'huile (sûr'mint l'graisse ed ches moulinets!), ches planques (sûr'mint décloées par ches pêqueux) et ches boutelles in plastique ch'est naturell'mint les resses dé ch'casse-croûte....

Mais d'qui qu'in est in train de s'foute? Mi, j'm'in vas donner quèques bons consels à nous z'hommes politiques pour cor saquer ein tiot peu pus d'sous, dins l'désorte:

mette ein impôt dsus ches vaques pour pollution d'l'air (ch'est qu'cha pête, cha madame!)

faire païer ches piétons qui us'tent ches routes aveuc leus semelles

et l'coq: ein' taxe dsus l'air qu'in respire, j'fais confiance à nous z'énarques pour carculer l'consommation moïen-ne d'chacun d'nous, ein' tiote multiplication et hop! l'tour i est jué.

Com-me qu'in dit dins ches lifes, "la liste n'est pas exhaustive", si o z'avez d'autes idées, j'les attinds.

Allez mes gins, j'm'in va préparer mes pêques pour aller polluer l'iau.