Retour au sommaire      

                                                       Mes coups de gueule!

 N°5 : In arprind ch'train?

Cha y est, mes gins, o z'avez bien digéré ch'référindome? O z'avez tout compris à ch'life d'esplication? Ben mi, j'n'a pont tout compris non pus, mais ch'n'est point l'causse d'min coup d'gueule. Ein d'mes grands amus'mints (si in peut dire), ch'est d'acouter nous z'hommes politiques nous espliquer l'pourquoi du commint. Et dù qu'cha devient farce, ch'est quand i prin'tent l'train, j'm'esplique:

Pont pus tard qu'hier, nou Minisse d'l'Industrie i a déclaré admirer l'modèle danois à propos de ch'Code du Traval et in route pour l'Danemark! Si j'a tout acouté, là-bas ches ouvriers i saquent com-me des boeus, i sont bien formés, i sont flexipes (nan, ch'est pont de l'souplesse, cha veut dire qu'in peut les déplacher com-me des pions!), ches syndicats i sont amiteux, et tout et tout......l'Paradis, quoi! Ch'est à s'demander pourquoi in resse in France.

Au momint de l'discussion de ch'Budget, i n'a toudis ein qui treuffe que dins tel ou tel païs, ches impôts i sont bien pus hauts qu'les nôtes et in route pour la Grante Bretane ou l'Italie. Par conte, ch'train i n'va jamais in Allemane: pinsez donc, là-bas, ches Inpôts i sont arténus d'sus l'quinzain-ne et tout ch'qui resse, ch'est du boni!

Meim-me canchon pour l'Éducation d'ches jon-nes: nous différints Minisses, cha n'manque jamais, d'nous donner in eximple l'modèle inglais ou américain (là, ch'est pus ch'train, ch'est carrémint l'avion) et in route! Seul'mint, "ches biaux merles" (com-me les app'lot min père) i z'oublitent ed'dire qui n'exisse, dins chez païs-là, faut que quèques pour chint d'écoles publiques gratuites pour ches paufes!

Allez, mes gins, ouvrez grantes vous orelles, o z'allez n'in faire des voïaches à l'étranger, j'vous dis qu'cha! Mais n'rêvez pont, nou train i est cloé in gare.....et pont à causse d'ches grèfes!