Retour au sommaire      

                                                       Mes coups de gueule!

 N°6: O z'avez-dit "Esprit olympique?"

Ben ouais, mes gins, cor ein cop ches Français I s'sont fait rouler par ches Rosbifs!  Que voulez-vous, in n'nous arféra pont! Et pis pour ête cor pire, ch'est pont la pein-ne........

J'viens d'apprinte que Paris 2012, ch'est foutu et, du coup, j'a bien ravisé l'télé et acouté ch'posse: pont d'doute là-dsus, ches bien nous les babaches d'l'Europe..........ch'est meim-me à s'deminder si quèques-uns d'ches mempes du CIO I z'érotent  pont voulu faire argretter l'nan français à l'Constitution (jé n'cite person-ne......mais suivez mes yux, caramba!). Ch'est sûr'mint des cacoules, tout l'monte I sait bien qu'ches arprésintants d'chaque païs, i sont correcs et  i n'font pont d'politique...........!

Ein' aute cacoule (ichi, j'rigole!): cha fait déjà quèques jours, dins ch'posse, i étot question que l'CIO i fache des armontrances à ches Inglais pasqu'i avotent rincontré ches futurs votants, sûr'mint pour leu d'mander des nouvelles d'leu païs! O n'croyez pont qu'ches Rosbifs I z'ont cangé, cha a continué au nez et à l'barpe ed tout l'monte.

Cor ein' aute: ches Inglais i z'ont laiché intinte qu'la France al férot miux d's'occuper "des démêlés judiciaires de M. Guy Drut" putôt qu'vouloir organiser des J.O à Paris et là, pont ein seul n'a armué l'ptit dogt, o n'trouvez pont cha ein tiot peu bizarre? Ch'est pétête cha qu'in appelle "l'humour inglais". Et nou Président, ed quoi i a eu l'air in déclarant qu'la France al a respecté l'esprit olympique, sans coup bas, etc........

Cha m'rappelle ein' cacoule ed Coluche, justemint dsus ches JO (j'vous l'mets in patois):" A ches Jux Olympiques, ches Français i vientent pour juer tandis qu' les z'autes I vientent pour gagner.......et i gagn'tent!"

Allez, mes gins, in n'in verra cor des z'autes et pétête pont des meilleures et tant qu'nouzautes, Français, in voudra rester correc, in l'éra toudis bien serré dins l'baba!

Pindant qu'j'écris, à Londres, des bompes al z'ont explosé dins quate plaches et cha, ch'est gramint pus grafe qu'ches gnognot'ries d'JO.  Et ch'est toudis ches gins du peupe qui s'font tuer, pont ches dirigeants du G8, eux i sont bien protégés! Ein' simpe armarque: so o z'allez y faire ein tour, ravisez dins ches parcs et ches plaches et o z'intindrez des drôles ed discours, n'importe qui i peut critiquer n'importe qui, I paraît qu'cha s'appelle "la démocratie", mi j'veux bien, mais ravisez dù qu'cha mein-ne!