Retour au sommaire      

                                                       Mes coups de gueule!

 N°7: Profitez bien d'vous vagances! 

Bonjour, mes gins, si o z'êtes in train d'vous faire garzir dsus ch'sape, profitez-in bien pasque pindant ch'timps-là, in s'occupe d'vous cas.........et d'vous sous! Com-me tous les ans, ches feulles al vont querre hardi pitit! Ches impôts et ches factures i vous attintent dins vous boîte aux lettes, ed quoi vous mette in joie quand o z'arviendrez à vous mason.

Si y avot qu'cha.............ch'est l'train-train habituel, mais voilà, j'cros bien que l'rintrée al va pont ête piquée des viers! Dins ch'posse, in comminche à intinte, par chi-par là, que ch'gaz i va augminter et qu'ch'est pont fini, l'resse i va suife: ch'l'essence, ch'toubac, ch'péache d'ches autoroutes et tout l'resse! Euh, quand j'dis l'resse, pont tout à fait: d'ches quinzain-nes et d'ches pinsions, pont d'nouvelles...............sûr'mint ein oubli!

J'arviens d'faire ches commissions dins ein grand magasin (ch'ti qui s'treufe dins ches camps): ch'est là aussi qu'in prépare vous rintrée! Ches rayons i sont pleins à craquer mais l"pus biau, ch'est ches fournitures scolaires: i n'y a qu'des couleurs et des dessins, ches jon-nes i sav'tent pus dù raviser! J'a longtimps caché après ein' trousse ordinaire pour mes pitits: ah ouaite! pont moïen d'in treuver ein' seule toute simpe, sans Barbie ou bien Harry Potter! Combien d'ingueulates j'a intindu! Ches jon-nes i s'roulottent dsus l'dain-ne (à terre) in brayant après ein cahier Batman ou des crayons Bob l'Éponge, ches parints, à l'toute fin, i z'étotent bien obligés d'acater pour avoir la paix.

J'vous l'ardis, mes gins, prénez des forches, o z'allez n'avoir b'soin d'ichi quèques jours!