Retour au sommaire      

                                             Mes coups de gueule!

 N°9: O z'avez dit Sportif?

           Bonjour, mes gins, décidémint, cha n's'arrinche pont du tout in ch'momint. A Nouzautes, in est fier d'nous fiux mineurs, écriveux ou bien sportifs. Mi, i n'a ein qui m'plaijot grammint :ch'étot Guy DRUT, un chti pur chuque d'nou coin. O n'avez sûr'mint intindu parler, li qui a comminché à Oignies pour finir Champion Olympique à Montréal: cha ch'étot ein sportif de l'lignée des Michel BERNARD, Michel JAZY et Jean WADOUX!

Seul'mint, voilà, dù qu'cha s'a bradé, ch'est quand i est dév'nu Minisse et j'cros bien qui a oublié ed dù qui vénot. J'avos déjà intindu parler d'ses micmacs, mais ch'matin, j'a eu confirmation: 15 mos d'prijon aveuc sursis, i a vraimint pont d'quoi ête fier!

Quand j'pinse qu'nous z'autes, pitits instituteurs dins nous pitits villaches, in n'cessot d'répéter à ches jon-nes qu'dins le sport il fallot ête courageux et rester drot dins ses bottes!

J'vas vous l'dire tout net: j'sus honteux d'vir qu'des grands sportifs i trimp'tent dins des affaires louches. Et que j'te favorisse l'copain d'min copain, et que j'te fais ein' fleur si té rinvouos l'ascenseur, et que j'vas parler d'ti à min camarate minisse.............j'in passe et des bien plus trisses.

Ch'est bien simpe: aveuc leu politique, i devientent fous, mais cha douot rapporter (dijez, dé l'prijon aveuc sursis, cha n'a jamais tué person-ne): min père i avot bien raison d'dire: "L'gamelle al douot ête bien rimplie, vu qu'i s'battent com-me des tchiens!"

Sur che, mes gins, j'm'in vas faire ein tour à vélo, là au moins j'sus sûr de n'pont faire des mauvaisses rincontes.

                                                                                                                                    Raymond

Misse à jour

Comme m'dijot min père: "Si cha t'rapporte, fais de l'politique" et i  avot bien raison: ch'matin verdi 26 mai 2006, j'apprinds qu'not' Présidint i vient d'amnistier ch'fameux ancien athlète ancien minisse d'Liévin, Guy D., autremint dit i est blanc com-me neiche, ch'est t'y pas biau tout cha? Comme dijot Coluche "Circulez, y a rien à voir, allez hop!".