Contes, chansons, textes en Picard

Tranmis par Viviane Longatte et Gérard Martel, merci à tous deux.

De nombreux textes ont été rédigés par Raymond Lancial (merci)

 Retour au sommaire

Ech bruit

Ch'est l'temps du boucan. du ram-dam pi du rantanplan. Partoute d'où qu'o z'allons ? o f'ssons trimpette das ch'bruit, tout du long du jour pi coère par nuit ? o z' est échoui. O sommes porsuis par chés décibels, ed chés mobylettes , pid' chés autos, pid' chés micros, pid' chés discos. Pan ! pan ! qu'cha buque das vou tête. O z'allons dv'nir madjettes ou bien beudets ! A nn'o ti du sins !

Beyez, das toutes chés moèsons gno toujours pour lé moins eune tchotté boète pour foèr du buzin, del musique comme i ditent, del musique ed fond, qui n'acoutent-té meume point. Pi a drine, pi a chuinte, pi a siffle, pi a oingne, pi a  buque gn'éroué qu'à torner ch'bouton pour qu'a s'éteinche.  

Mais allez don ! Pu cha djeule pu qui sont contints ! O s'app'lez cho del musique! Ch'est un touillage, un imberbouillage ed souglous, ed djeulages, ed mamionnages, ed  bedjéyages eune vaque a n'i r'connaitroué mi sin vieu !  

A glougloute, a griche, a pète, a romionne comme un viux poussiu, a routèle comme un mawais, a buque comme un g'vau malade, pi pa d'su tout cho gno tchèqu'un qui tape su des castroles ed' su s'commode ou sin buffet.

Das nou viux temps, o n'avoué mi d'zoin ed dopinge pi d'musique ed singe. O vivoué das un treu d'silence, das un poéyis sins bruit ! Ch'étoué I'boin temps !

J'voroué vous aidii à rapinser ch'momint-lo, comme je l'ai vétchu quand  qu'ch'étoué l'paradis su l’terre, quand qu'i inavoué point d'buzin, point d'télé, point d'radio. point d'clakson et pi point d'autos.

Ev'nez, dékeuchez-vous, suivez-mé un molé das min temps.  

O sommes das nou moéson tous les deux, bien anichés pi o z'attindons. Quoé qu'o z'intindez ? Rien ! Ouvrez vos érelles, pi acoutez! Ch'est l'silence. O n intind mi rien ! Sié, mais point grand-cose. Tindez-lé bien vous érelle pi atindez ! O n'intindez point el tchotte soéris qu'all rotonne das chés  viux papiers das ch'guernier ! Ch'cricri qui gratte tout duchemint das l'écminée ! Ch'pingeon qui roucoule pertché su ch'noc del gouttière ! El comtoèse qu'all tic taque das s'boète in djignant de s'n'oeil jon-ne das un tchuin del tchuisine ! Ch'co qui ronronne su ch'gron d'grand-mère pi ch' fricout qui mitonne das ch'tchou pout ed terre.  

A m'sure gno un tchien qui donne quand qui gno un rouleu qui passe das chés rues. VIo tout ch'qu'o z'intind, chés pantoufles d mémère qui glichent-té su ch'pavé, eune cayelle qu'o pousse, el porte qu'all s'ouve, pi o z'attind!

Par nuit oz'intind que ch'vint quand qui n'in foé, pi seulmint s'n'érelle qu'ail siffle quand qui n'in foé point. Chés silences lo i n'in disouettent-té grammint, puss que ch'vacarme d'où qu'o vivons !

Chés temps i z'ont cangé, l'reue all o tonné, mais i z'ont oublii del graissii, l'reue, ch'est qu'all foé un rude barouf inhui pi qu'o n'o point fini d'ête échoui !

                                              P. Duquet