Er'vleu eune énèe ed plus, Coère eune. A c’minche à foère. A forche ed n'in er'mette, conme eu, eune pis coère eute, o'z'alIons finir par n'in vir el bout, ed no pieute vie.
Ermartcheu, o n'êtes mi pressés, vous? Tant miux, mi non pus. Bié seur, o'z'ons tertous nos pieutes misères, fil à m’sure qu'o z'avanche in âge. Comme o dit : "In vieillichant, chès raideurs i s'deplach'nt ". Mais bon, à n'est point eu el pus pire.
Mais edvant d'vieillir, tant miux, o'z'é piot, loin ed pinseu à tout ch'qui vo s'passeu pus terd, sans souci, comme i dit'nt chés pérints : "Tu n’eu qu'tes eureilles à s'coueu, otchtup't ed té jueu, profite, i s'reu tojours temps pus terd ed t'en n'in foère du mèchant sang ". I z'ont bié raison, chés gins, ed dire eu, qué boin temps eq'ch'étouot, quand o'z'étouèmes piots, meume si o nous greumlouèmes quand i follouot alleu à l'école. Ech'qui étouot lé miux, étant piot, ch'étouos justemint, à ch'moumint-leu d’l'énée, el preume d’janvier, qué bien jour. Bié seur, i follouot s'il alleu mon de's'famille, onques, tantes, cousins pis tout l'sainte famille, point chés tayons, bié souvint, i se t'nouain't coère aveuc leus éfants, ou ch'étouot putôt chés éfants qui se t'nouain't aveuc leus pérints, el pus souvint à cho ferme, pisque tout l’monne, infin, presque tout l'monne, étouot pus ou moins dins la tchulture.
Bon, o nos z'in allouèmes mon d'no gins, i follouot éte sage, pis polis, pis seurtout, n'point mantcheu d'el dire : "Eune boène énèe, eune boène santé ". " A ti tou, min piot " qu'i disouaien't tertous. 0 c'minchouèmes per chés pus viux, chés pus preu ed périntè, pis, edvant tous les eutes, per no parrain, marraine. Pis chés deux leu, i follouot ez'z'é sogneu, miux eq les eutes pasque el nouvelle énèe, ch'étouot l'jour ed chés étrennes, A vos dit, chés étrennes? Oh a n'étouos point grammint ed sous, eune pièche o bié un billet, point d'quoi foère de folies, non, mais ch'étouot chu jour leu qu'o z'avouot des sous, alors, forchémint, a comptouot, Pis coère, i nous faisouai'nt attenne, d'abord i n'in finichouai'nt point ed perleu, ed toute pis dé rien, pis o buvouot un cœup d'litcheur, aveuc des piots gatieux o bié souvint, des pieutes gaufres sèques. Long qu'un bout d'el soérèe, mi j'attindouos, ej n'in povouos pus : ech l'énèe chi, j'allouos ti avoèr plus o bié péré qu'l'énèe de d'vant?
Pour n’in finir, ej tchéouos ed fatigue, i étouot l'heure ed s'in alleu, toujours rien! A n'est qu'audarin momint, in derrièreed tout l'monne, infin, je
l'creuyot, equ'cho piècheal étouot glinchèe dins no main. "Tiens, piot, ché pour ti, warde’lé, ne l’gadrouille point, tu sais, tu n’éros pus edvant l'énèe tchi vient", pis pus cho pièche al étouot pieute, pis chés conseils i étouai'nt gros, Nous, chés piots, o l'sarrouèmes dins no main, au fin fond d'eune poche, pour e'n point l'perde, pasque apreu, i follouot coère rinde des comptes à m’sure.
Inhui, des sous, chés jonnes i n'ont à gronnée, n'in veux tu, n'in vlo. Sans raison, tous les mouos o bié meunte tous les s' maines. l sont pus apprinds que d'no temps, in tous cas, i sai’nt dépinseu. Est i miux o bié point? Je n'sais point, tout ch'que j'sais. ch'est qui n'in sont pétète point pus contint pour o, mais inhui, el boène énèe, ch'n'est pus ch'que ch'étouot. I z'y vont coère un molé, ed certains, dire ches " boène énèe, boène santè" mais achteure. i feurouot presque ez'é trineu, pasque a n'est point aveuc ech ch'qui o à récouer
qui vont avouér invie d'alleu passeu leu temps conme eu.