Contes, chansons, textes en Picard

Tranmis par Viviane Longatte et Gérard Martel, merci à tous deux.

De nombreux textes ont été rédigés par Raymond Lancial (merci)

 Retour au sommaire

 

 

 Inondations : Un an apreu

Un an apreu………..
In deux mille un, durant l'hiver darin, qué misère, no belle rivière, la Somme. pis quiques méchants rieus alintour, i z'ont juè des tours in s'désatchant ed leu lit. Va t'in savouer et coeuse. Cho pleuve long qu'un bout d'l'hiver, apreu du méchant temps au long d'l'énèe ? Chés rios mal interténus, plein d'raques o bié d'herbes point feutchèes ?
Ech canal du Nord rinvoyè ed nou côté por e'n point noéyeu chés Périsiens ? El sérons-nous jamouais ?



Quoi qu'i n'est, qué catastrophe pour chés gins qui z'ont pardu tous leus affoères, meubles, machines alectriques, voétures pis meume mouaisons. Durant des jours pis des moés, tout rimpli d'ieu. obligés d'émonteu chés meubes edsus d'z'agglos, chés caves rimplies, meunme des batieux dins chés rues. Oh, est rédeux, pis grammint ed gins, des tchurieux seurtout i v'nouain't soé disant pour "compatir": pététe. Mais grammint étou, i v'nouain't pour vir tout court, pis povoèr dire apreu : "ej'y étouot". Qué malheur, de r'beyeu conme eu el misère ed chés gins. Ed'z'eutes. du contraire, i'n'sont point v'nus vir, mais i z'ont invoéyè quoique sa quoi, l'un des affoères, un eute des sous, des tchultivateurs do'paille o bié des norritures pour chés bêtes. Des piots i'z'ont té mon ed leu famille o bié mon d' leu z’amis, quiques jours o bié quiqhes es'maines, pasque chés ieux, i n'ont point té leu des jours mais bié des mouos.

Infin, el " solidarité " conme o dit, al o jué. Quoé qui n’in fuche, tout eu e n’fouot point domino, ches paures gins eq’leu mouaison al es breuillée o bien seulmint in'habitabe, a d'où qui vont s'é't'nir ? alors leu, ch’l’administration al o déblotché des sour pour eune idéd du diabe… chés fameux " mobilomes ". O saveu tertous quoi t'chest, un mobilome !! E bié, je n’'dis point pour dépanneu, o, est seur. Est bié étou. In vagance, au boin temps, au solé, au bord de lieu, à l’mer o bié al pêque. Mai, por s'y t'nir eune énée durant, pasqué i z'y sont coére, chés gins, un an apreu, dins chés mobilomes. Pérouot-i equ' chés "dossiers" ed réparations i n'sont point fouots. Alors chés gins i'z'attennem't.