Contes, chansons, textes en Picard

Tranmis par Viviane Longatte et Gérard Martel, merci à tous deux.

De nombreux textes ont été rédigés par Raymond Lancial (merci)

Sydney, pis tout l'Eustralie, é seur, ch'est un bieu poéyi. I z’ont bié do' chance d'alleu là bos, aussi loin, pour leu jueu, tous chés athlètes. Seurtout chés picards, à vo leu cangeu in molé pasque chu climat i n'est point l'meume equ' per ichi, seurtout pour chés ieus, là bos i frouot putôt sé.
In tout cas, ech' que leu souhaite, ch'est de's'batte aussi bié que z' Eustraliens y l'ont fouait in quatorze, quant i sont v'nus moèrir in Picardie po nos définde durant la djerre. Ch'est bié l'moins qu'i peuch'nt foaire pour leu rinde hommage.
Nous, oz’é r'béront à la télé. Mais in picardie, des jux, a n'est point o qui manque. Bon, i, n'sont point preu d'é'n n'in foère eune "discipline olympique" ed nos jux, mais pétète qu’i porrouai'nt y pinseu, pour 2004.
I z'ont bié mis chu tennis, mais quoi qu'ch'est, eq'chu tennis, a n'est jamouais equ'do'balle au tamis. Ichi, quand j'étouos piot, min père i'n'in perlouot, chés jonnes i z'y juett'nt ech dimènche, jusqu'au vêpre.
Pis chu jav'lot, dont i feut eune bille ed bos, pis des jav'lots, non, point les meumes equ' chés Grecs, des longues barres pointuses, non, des sortes ed fléchettes, mais bié pus grosses. Chés jueux y cour'nt quiques pos, pis y plot'nt leu jav'lot dins l'mitan ed cho'bille, infin, au mitan, quant chu jav'lot i veut bié y alleu pasque y in eu qui pass'nt au côtè, alors leu, point tchestion d'es'mette edvant.
In molé pus calme, meume eq'chés piots i z’y jut'nt, ch'o guernouille. Leu ché conme un pio meube, chu d'sus i l'o des treus, y in o un aveuc un tornitchet, conme chés piots molins à l'ieu equ’ chés piots y fouai'nt dins
chés caniveaux quant i tchè des ieu justemint, pis un eute aveuc eune guernouille in fonte, ché aladon qu'oz appelle eu un ju ed guernouille. I feut j'teu des piot palets in plomb dins ch' treus, y tchèt'nt dins des casiers pis o merque des points, bié seur, ch'est cho guernouille qu'a n'in merque ed plus.
Dins l'Vimeu, in bieu coin ed Picardie, sié, sié, o poveu m'croère, ch'est un coin qu’ej connouos un molé, chus fameux jux d'assiettes.
Alors leu, chés coère un ceup péré, dins l'midi, i z’ont fouait cho pétanque, mais no z’assiettes, ché coère é miux.
Ed sus eune longue plaque in bos posée edsus deux trétaux pour eq’chu bout i balanche un molé, seutout i feut qu'à fuche souple, chatchun ed chés jueux, i sont à deux, i jette ses assiettes, des rondelles ed bos étou, un molé épaisses.
Ch'ti qui gagne, ché ch'ti qui l'est el pus preu d'ech bout ed' tabe.
Attention, é coère un molé rédeux à foère. Pis étou, à claque el diabe,
metteu don chonq six tabes au côté l'eune ed l'eute, pis resteu z'y eune heure, o'z' aleu vite ête échoui.
I y a eu ed'i eutes, ed jux, pis meume un connu ed tout la France pisqu'i y o un championnat ed France, chés chu fameux ballon au poing, edsus eune plache, attention, y feut du grand pasque, lo étou, a claque.
Deux etchipes, coère un ceup, d'un côté ed l'eute qui s'renvoi'nt eune balle aveuc leu poégnet, y feut l'foère, i feut tête d'ichi pour bié foère.
I n'y o qu'à vir, tchèche qui peut égaliser chés etchipes ed per ichi, parsonne et pis e j'sus bié seur que ch'l'énèe-chi, ch'est coère in Picardie qu ech tite ed champion i l'est r'venu.
Bè un molè, que belle médaille d'or qu’o z’érouèmes yeu lo.

Jacques Berthe