El'Sin de Vau* i'est tout in foufelle. In effet, in a réquisitionné eune vielle granche pour y fourrer eune milette d'soldats complètemint arcrans qu'i'arvenotent d'savoir battu avec el'zinglais à Malplaquet*.

I'in a qui totent bien pronnés!

In tot in Septempe, y'avot del'palle dans l'granche; chétot tout c'qui fallot pou s'arposer, in frot moncheau qui croque!

 

Tous les gins i'accourotent aux nouvelles!

Les gins du Sin De Vau n'sont point riches, mais tout l'monte ramène eune tiote saquo: des cognets d'pain, des uefs...I'a toudis d'quoi s'rafourer.

"Nos otes, in d'a d'jà vu passer des soldats d'tous les pays, et cha n' dos pas ëte fini!!"

Les soldats racontotent leu misères:

"In leu a mis eune bonnes dépourrée aux inglais, comme ché chi, i'n'sont pus là d'arcomincher, mais in a bin été forché d'batte in r'traite.

In nos a dit qu'el général Malbrough* i tot bel et bin mort."

 

Là d'ssus, eune paire d'épilvodés pinsotent quind même à rigoler et à canter. I busiotent au général Malbrough. L'sergent i'avot souvenance d'eune vielle canchon qu'les soldats i cantotent dins l'timps, alors sur l'air de c'canchon là, in inventa d'zautes paroles qui disotent:

 

"Malbrough s'en va t-en guerre,

Mironton, mironton, mirontaine,

Monsieur Malbrough est mort,

Est mort et enterré..."

 

L'canchon fut bintôt baclée. L'lendemain, i fallot r'jointe les troupes au Quéno*.

Bint^tot tout l'Quéno n'avot pus qu'cha à l'bouque: l'fameuse canchon d'Malbrough étot née.

 

Queques années pus tard, in avot un peu oblié Malbrough. Près de d'quatre vingt ans pus tard, à l'cour du Ro Louis XVI, eune jonne camusette d'no région étot l'nounou du tiot dauphin.

Tous les soirs, pou li faire printe s'somme, l'bonne fille al'i cantot l'canchon d'Malbrough.

Marie-Antoinette volut l'apprinte et tout l'monte à la cour in fit autant.

 

Du Sin de Vau à Versailles, l'canchon al n'a pas pris eune rite, ché toudis parel:

In veut souvint interrer s'ennemi avant qu'i fuche mort, mais attintion, mes gins, el'bac s'artourne toudis su l'pourcheau, n'a rin qui passe sans rapasser!!!!!

 

*El Sin de Vau: ORSINVAL, su eune carte de 1572, s'appelot St Vaast

 

*El batale d'Malplaquet s'déroula le 11 septempe 1709

 

*Malbrough, en fait Duc de Marlborough, général qui dirigeot les troupes inglaises.

Malgré l'rumeur, le Duc n'étot pas mort, i tot faut qu'blessé à sin g'nou.

 

*Queno: Le Quesnoy (59)