Contes, chansons, textes en Picard

Tranmis par Viviane Longatte et Gérard Martel, merci à tous deux.

De nombreux textes ont été rédigés par Raymond Lancial (merci)

 Retour au sommaire

 L’histoire ed Marie Grouette

Dins des temps ertchulès, al intour ed Dguise, l'Oèse al coulouait, ermertcheu qu'al coule coère inhui mais ach ch'moumint-lo, al étouait rimplie ed guernouilles. Pis soèr et matin, chés guernouilles lo i cantouai'nt : "Mari' Grouette, Mari' Grrrou...ette, Grouett'. Grouuett".
Chés gins. un molè simpes, comte i n'y in avouait grammint, i y in eu coère étou inhui (plus qu'ed guernouilles), i creuyouai'nt intenne eune "ondine", eune sorte d'ange.
Mais un jour. vl'o t'i point qu'un piot i tché dins lieu, un bois gars qui passouait, i l’o ieu bien se j'ter à lieu, wate, i z'ont te noéyès tous les deux.
Chés gins, seurtout chés pieutes têtes, tornant casaque (la s'fouait coère étou) i z'ont fouait porteu à do, à ch'l'ondine de s'z'avouèr noéyès, pis i z'ont ieu l'idèe de s'n'in débaracheu. Chu pus maouais, ch'ti leu qui perlouait, ch'étouait un bieu perleu, un avocat. Latapette qui s'appl'ouait. "Débarrachons nous d'o, a nos o noéyé deux gins, un bieu jour al vo impoésonneu chés ieu, mette el fu, voleu pétète". "I feu alleu vir Dgudulle, al est un molé sorcière, i n’y o qu'elle pour n'in v'nir à bout". Ni eune, ni deux, ch'est chu Robert aux Grands Pieds qui l'o tè coési pour sin'alleu à Vervins mon Dgudulle.
Robert. i n'marchouait point i courouait, pis coère bié pasqu'i follouait foère vite edvant eq Marie Grouette a s'aperchuche de ch'qui s'tramouait dins sin dos.
Arrivè su plache, point moéyen d'intreu, eune sintinelle wardouait cho porte, pour n' in finir, Robert i o fouait tcheur Dgudulle, pis i y o esplitchè s'n'histoère. A i o fouait jureu ed ne rien dire de ch'al allouait foère, i o jurè.
Dgudulle al o fouait sortir du fu d'un grand coédron, a sintouait eune odeur infernale pis al disouait des paroles qui n'comprindouait point. Apreu o, al i o mis dins s'main un piot sac aveuc des dragées ed tous les couleurs in i disant : "I feut n'in mette treize dins l’ieu durant trouos jours in disant : morte soit-tu, tu ne tueras plus". Pis aveuc o al s'rot impoésonnée.
Robert aux Grands Pieds prind chu saclet, lé mets au fin fond d'eune poche ed tchulotte pis i r'prind sin c'min jusqu'à Dguise. Mais o z'étouèmes in plein mué d'eût, i faisouait eune qualeur du diabe, no Robert i n'in povouait pus, i s'met au rados d'un ape, bié au l'ombe, lé vlo indeurmi. Un grand moumint pus terd in ouvrant ses quintchets, i met s'main dins s'poche, pus d'sac. Nom d'un tonnerre, quoi que'j m'in vo foère? Ni eune ni deux, i ratorne vir Dgudulle mais vlo ti point equ dins l'contretemps, al avouait té prinse in route à foère des misères edsus des glaines noères pis mis au cachot.
Lé vlo r'parti tout s'rumionnant dins ses dints, arrivé un molé pus loin, à Voulpaix, lo qui s'avouait indeurmi, un monne dins chés rues, in route à braire, trinte neuf éfants impoésonnès pasqu'i z'avouai'nt mingé des dragées.
E'z'é vlo, mes voleus, qui dit Robert, i s'appreuche pis s'présinte comme un r'bouteux :" J'm'in vo ez’zé dguérir, mi,vos piots". I foèt un singne ed crouos, chu premier piot i raque un ceup, miracle, cho dragée satchèe du moumint, ainsi d'suite dusqu'au darin. I rintinque ses dragèes dins s'tchulotte pis lé vlo parti tout courant, eq chés gins i n'ont point peu li dire seulmint marci.
Rindu à Dguise, treize dragèes dins l'rivière durant trois jours conme al avouait dit Dgudulle, mais Marie Grouette al étouait colère leu, pis al cantouait meume ed pus in pus. Quoi tchèque t'o fouait, don, Robert, eveuc tes dragées, qui l'i dit Latapette, tu ne'z'érouait point chuchès au moins?
Robert i n'savouait pus d'où s'mette. i lachce ech morcieu ed chés piots ed Voulpaix. "Imbécile", qui l'i dit Latapette, va t'in, boin à rien. Chu Robert i s'in vo, drouot edvant li: arrive à l'rivière, i intind Marie Grouette qu'al lé nardg'ouait in cantant : "Attinds, tu vos aroèr affoaire à mi ", i seute dins l'ieu, i n'o jamoais r'nu, lé vlo resté au fond.
Edpus chu jour-leu, parsonne n'o jamouais pus trachè à impoésonneu Marie Grouette, al est coère leu, pis autchun piot n'vo jamouaios à l'rivière, ed peur eq Marie Grouette al l'inlève.
Infin, ché ch'que chés pérints i leu dit'nt quand i sont par trop maouais.

Jacques Berthe

Ware: interjection (allez, va, ....)
Tcher :tomber