|
J'vas point
vous fouère ein' lechon d'histouère, ché point d'ech' président Sadi Carnot
qu'ech vos vous intertnir, chétouait l'tchien d'mes grinds-parints qui
s'apellouait insi ! J'ai n'lai meume point connu, mais j'ai n'a intendu perler.
Carnot, chétouait un tiot bâtard nouer qui avaouait s'niche dins l'mur d'ech
fournil .I gardouait ben l'mason quand grand-mère Marie al allaouait din sin
courtil .
Al poyouait laiché s'porte grinde ouverte. Carnot i n'poyait point
sintir ech facteur ni ches merchands ed tapis ou autes colporteux! Mais i
surveillouait ben ches glainnes, toutes des nouoires, qui étouaient lipes dins
l'cour, dins l'patûre et dins ch'boquet in face de l'mason de l'rue de ch'Marais
qu'al étouait point goudronnée adon ! I aurouait point fallu qu'ein' glainne
blanque ou bin rousse vienche picorer dins nous basse-cour !
Parfouais,
grand-mère Marie al li donnouait un tiot mot à porter à Lucie, eune cinsière
d'elle rue d'in hiaut , quand al avouait b'son d'quèquecose .
Ech tchien
Carnot i étouait finaud et i comperdouait tout! Un biau jour ed'Janvier, qui
gélouait à pierre finte, v'lo nou Carnot qui s'ramène à l'mason aveuc ein lapin
dins gueule. "Beh , qui dit min taïon Fideric et dù qu'i o été querre ch'eul
carogne-lo! " I print ch'lapin , i traverse l'route , et pis ch'tit pont de
l'rivière et i s'avinche d'in ch'boquet qui étouait tout in pinte, et vlan i
fout ch'lapin dins ches orties . Quèques jours pus tard, i s'a mis à neiger!
V'lo Lucie pis s'nhomme qui vientent étrinner , dire el boène année à mes
grinds-parints. Et y boètent ein tiot coup tout in d'visant :
" Ah ! qu'al
dit Lucie, figurez-vous qu'y au des voleux dins nous villache! Y a quèques
jours, j'avouais tué un lapin pou nou dîner et j'lavouais laiché à terre dsus
min trottoir pour aller querre un plot al cuisine, j'arviens : pus l'lapin
!
- Bon diou, qui dit grind-père Fidéric, mi j'sais dù qu'i est vous lapin,
Lucie! " Pépère i traverse el cour et pis rue du marais in face , i déchind
edsus tiot pont de l'rivière et i s'avinche dins ch'boquet arcouvert d'neige
bien gélée. I écarte un mollet chez orties et artreufe ech'lapin rouède comme
la justice ! " Ben l' vlo , Lucie , vou lapin i est ingélé et tout intier et
toudis bon à minger !
- Et ben, qu'al dit Lucie, Frédéric et Marie, o z'allez
v'nir diminche à l' mason minger ch'lapin aveuc nous, in l'férons cuire aveuc
des pruneaux !
Tchien Carnot i o vécu viux, mais i étouait d'vénu dur
d'orelle .Un jour, dins l'rue de ch'marais au milieu de l'neige, i n'o point
intindu arriver l'auto d'ech mannier d'ech' molin à ieau et i s'a fait écraser !
Faut dire que ch'mannier i n'avouait qu'un oeul ! i étouait borne ! Et pourtint,
i n'avouait pont gramint d'voitures dins l'villache in ch' timps-lo! Mes
grinds-parents i z'ont pus janmais eu d'tchien ! Mais quand in allouait in
vagances, in m'demandouait porquouai qu'i avouait ein' niche dins l' mur d'ech
fornil et pis pont tchien !
Marie-Lou
|
