Retour à Nouzautes                                                                             Sacrés Saint Polois!

M’arv’là ! Hein, mes gins, , alle est t’y gênante Catherine et alle est toudis à m’arprinte….Je m’demande des foés si alle a pas été piquée par eine aiguille à phonographe ! Quand je l’ravisse, je m’dis que si in veyouait les femmes 30 ans après, on s’mariroait pas 30 ans avant. Par conte, Dany l’présidente du Comité des Fêtes, là ouais……. J’éroais eine pouillette comme cha dins min garnier, j’tue min cat ! Enfin, ch’est comme cha et pour in finir aveuc Catherine, mi j’dis qu’in peut pas faire ein canari aveuc eine cornalle.

Et Jean Pierre………… li ch’est pas miux………… il est aussi dégourdi qu’un pourchau aveuc s’queue. L’aute jour, il a dit à Gégé : « Sorte pas lundi, ch’est l’ramassache ed ches gros objets, té vas t’faire imbarquer ».

Mais li, Jean Pierre, i ronfle !!! In plus, dormir dins l’mein-me champe qu’li, que calvaire pasque Monsieur ronfle, Monsieur tousse et ……….Monsieur pète !!! Et mi, nan mais, j’fais des cauchemars : j’vous don-ne ch’ti qu’j’a fait avant hier.

J’a fait ein rêve el nuit pasée

com-me jamais n’avos fait,

rêve qui m’donne cor frod dins l’dos  

et qui vous férot dév’nir sot !

J’sus cor transi

Et j’sus cor hors ed mi !

Rien qu’d’in parler, j’in tran-ne cor,

Ouais…………..j’ai rêvé qu’j’étoais mort !

Alors v’là t’y pas qu’j’intinds m’femme

crier : « Enfin, il a rindu l’âme,

merci min diu, ch’coup-chi cha y est,

m’v’là débarrachée ! I me n’a fait du chagrin,

cassé l’vaisselle à tous momints,

dijant qu’avoais tous les torts. »

J’pouvoais rien dire………..mi, j’étoais mort !

Ah ! que calvaire l’première nuit 

ed vir veiller mes bons amis….

Chacun leu tour aller dins l’caffe

boire min pinard……………..les galaffes !

Allez !.bistoulles, jus d’cartes

Em’femme alle leu z’avoait fait de l’tarte

J’éroais bien voulu les foute déhors

Mais j’pouvoais pas…vu qu’j’étoais mort !

Pour dire qu’j’a connu l’enfer

Quand i z’ont partagé mes affaires

I s’régaloaitent, ch’est pas biau,

In jétant m’boîte à clos !

Mes outieux burins, truelles

Allez, toute à l’poubelle .

I vidoaitent ches cartons d'bas in haut

Pour cacher après ch’magot……..

I pinsoaitent qu’j’avoais ein trésor

J’pouvoais rien dire…vu qu’j’étoais mort !

J’aroais donné je n’sais combien

Pour em’réveiller sur el momint

Mais min rêve étoait pas fini….

A l’interr’mint, ch’étot cor pis !

Hommes et femmes, que épouvinte

In jétant de l’iau dsus min vinte

Monsieur l’curé et ches croquemorts

Mais l’les laichoais faire…….. vu qu’j’étoais mort !

Mais arrivé au fond de ch’tro

J’ai fait ein bond d’3 mètes de haut

Heureus’mint que j’m’a réveilé

I conninchoaitent à m’armucher !

Eh bin, mes gins,

Si ein jour dins min plumard

J’arfait l’mein-me cauchemar

Dites-me si j’ai raison ou si j’ai tort