MINEUR SANS MINE

cha y est m'fosse alle est framée
vingt ans que j'déquindos au fond
vingt ans ed'poufinque à respirer
à n'in rimplir mes paufes poumons

si j'peux pus mette m'barrette
quo que j'vas mette sur m'tiête
et si j'peux pus aller dins l'talle
quo que j'vas faire comme travale

quand j'passe ed'vant sin carreau
ed'savoir qu'j'irai pus dins ch'tro
dins min coeur j'arsins un grand frod
cha m'rind trisse cha m'fait ed'mau

même si j'sais qu'j'ai de l'silicosse
mi j'avos quère d'ouvrer à l'fosse
quand j'armontos j'étos noir ed'carbon
mais j'étos avec mes camarates au fond

des fos in partageot note tchiot briquet
des tartines ed'fromache ou bin ed'paté
ch'étot bin comme si ch'étot un banquet
ch'étot des tchiots momints privilégiés

j'sus core trop jone pour prinde m'pinsion
pour tout laicher, m'occuper ed'mes coulons
mais ils veul'tent pas non pus d'mi à l'usine
quo que j'vas pouvoir faire si y a pus ed'mine

y est pas question ed'm'inscrire au chomache
mi tout cha que j'veux ch'est d'l'ouvrache
j'sus pas core prêt pour faire l'mindicité
alors si y a pus moyen j'préfère incore crever.

qui sait p’t ête qu’ dins un coin du au paradis
y arot un tro ed’ fosse qui n’attindrot qu’mi
pour rimplir des pleins barrous ed’carbon
qu’in inverrot in infer pour cauffer ch’démon

DINS L’NEICHE

l'neiche al quait arcouvant l'tierre
comme si al voulot cacher l'misère
mais t'as bieau tout arpeinde in blanc
in d'sous cha n'sera mi neuf pour autant

même dins ch'biau décor immaculé
tous chés mineurs y vont ouvrés
sur l'route ed'frod y vont tranner
mais dins l'fond y vont s'récauffer

pour gagner ed'quo nourrir leux infants
y n'ont pas l'drot d'ête des fainéants
et comme avant eux l'ont fait leurs pères
y vont dechinde pour gagner eune misère

l'poste fini quand y vont rintrés
leur femme aura préparé ch'baquet
avec del'ieau qu'al'ara fait cauffer
et eune fos qu'y seront bin décrassés

alors y pourront un peu s'arposer
au coin de ch'feu boire un café
et d'main qui neiche ou qui vinte
y arprindront l'quémin de l'dechinte